L’investigador de la Universidá d’Uvieo Miguel Rodríguez Monteavaro (Boal, 1990), que trabayó como responsable del Serviciu de Normalización Llingüística de los conceyos de Grau y Candamu, va presentar el 14 d’octubre na Casa la Cultura de Grau, la so tesis doctoral sobre la forma de falar del territoriu centro-occidental d’Asturies.
El trabayu en cuestión titúlase Estudiu dialectográficu y dialectométricu na frontera ente l’asturianu central y l’asturianu occidental (EDACEO) y foi la investigación cola que Rodríguez Monteavaro defendió’l so doctoráu y cola qu’obtuvo la calificación de Sobresaliente Cum Laude con Mención Internacional en diciembre de 2021. Esta tesis doctoral tien como puntu de partida la recopilación y la presentación de datos llingüísticos dialectales del área centro-oeste d’Asturies, que fueron recoyíos gracies al trabayu de campu fechu en 18 llugares de los conceyos de Grau, Candamu, Tameza, San Adrianu, Uvieo, La Ribera, Llanera y Les Regueres. Tola información del EDACEO foi sistematizada y taxada col fin d’atopar estructures llingüístiques superiores a lo que dialectoloxía tradicional aventuraba.
Nesta comunicación va facese un breve resume de les característiques del trabayu y van adelantase les principales conclusiones de la tesis. Los oxetivos finales de la presentación son mostrar nueves formes d’analizar dialectalmente’l territoriu asturianu y enseñar al públicu en xeneral y, sobre too, a les persones vinculaes col trabayu de campu, la investigación que se llevó a cabu.
No hay comentarios:
Publicar un comentario