ACTOS DE LA 40 SELMANA DE LES LLETRES ASTURIANES EN EL AULA DE LAS METÁFORAS

Asturianu en branu

El Serviciu de Normalización Llingüística del conceyu de Grau organiza las xornadas "Asturianu en branu" con actividades culturales n’asturianu.

El Serviciu de Normalización Llingüística del conceyu de Grau organiza unas xornadas que llevan por nome "Asturianu en branu", que tienen como fin crear una rede constante d’actividades culturales n’asturianu a lo llargo del branu. Estas xornadas nacen de la petición de las personas qu’asistieron a los cursos d’asturianu que se fixeron nel conceyu nos anteriores meses ya del interés pola cultura asturiana de los moscones qu’asisten de manera regular a los evento sorganizaos dende l’área de Cultura de Grau.

La primer cita va ser el día 12 de xuliu a las 19:00 horas ya va correspondese col empiezu de las fiestas de Santiagu ya Santana. L’encargáu d’abrir el programa va ser Xandru González Fernández, cocineiru de la Escuela Pública Bernardo Gurdiel, que va dar una charla con título “Influyencia del Mercáu de Grau nel queisu d’afuega’l pitu”. D’esta vuelta’l cocineiru ya investigador va esponer un trabayu que tuvo faciendo por dellos llugares del conceyu sobre cómo los mercaos semanales de la capital moscona definieron física ya socialmente’l productu más característicu de la contorna ya va ponelo en relación con cómo conocemos güei en día esti queisu.

Las outras dous citas braniegas van ser a finales d’agostu ya de setiembre, ya van centrase, respectivamente, nuna ruta etnográfica pola zona salcedana del conceyu de Grau ya nun alcuentru con escritoras ya escritores mozos.

Estas xornadas van faese na Casa la Cultura moscona ya van ser de baldre. Amás tán dirixidas a la población en xeneral, pues van tener carácter divulgativu. El Serviciu de Normalización Llingüística de Grau, con estas actividades de branu, sigue’l camín d’eventos qu’empezóu hai unos meses nel conceyu ya márcase l’oxetivu de siguir los cursos d’asturianu, que van abrir plazu de matrícula en setiembre.

CELÉBRASE LA SEMANA DE LAS LLETRAS ASTURIANAS EN GRAU CON DELLAS ACTIVIDADES

Van celebrase dellos actos en Grau pola la Semana de las Lletras Asturianas en colaboración ente’l Serviciu de Normalización Llingüística de Grau, la Conceyalía de Mocedá, la Conceyalía de Cultura, los centros educativos qu’hai en conceyu, l’Aula de las Metáforas ya la Conseyería de Cultura del Principáu d’Asturias.

El xueves 3 de mayu pretende ser una xornada festiva onde se va faer usu de la llingua asturiana polas cais de la villa moscona. Organizáu pol Serviciu de Normalización Llingüística, a partir de las 12:00 na Plaza del Mercáu (Plaza Xeneral Ponte y si llueve, na Capilla los Dolores) va celebrase’l Día de las Lletras Asturianas cola participación ya colaboración de la Escuela d’Educación de 0 a 3 años, la Escuela Bernando Gurdiel, la Escuela Virgen del Fresno, la Escuela de La Mata, l’IES Ramón Areces ya l’IES César Rodríguez. Tolos neñas ya neñas que tán matriculaos n’Asturianu, que suman un total de 500 alumnos, van baxar a la plaza pa disfrutar d’un eventu que se va dividir en dous partes. Primeiro van venir a Grau representantes de la Universidá d’Uviéu, de la Academia de la Llingua Asturiana, de la Conseyería de Cultura ya del Conceyu de Grau ya van faer entrega de dellos lotes de llibros pa las bibliotecas de los centros moscones. La segunda parte del actu trátase d’un conciertu del grupu de música tradicional-indie L+R, formáu polos músicos Leticia González ya Rubén Bada, que van cantar unas piezas col sou pandeiru ya la sou guitarra eléctrica.

Amás d’esto’l miércoles 2 de mayu a las 19:30 na Capilla los Dolores va faese entrega de los diplomas del «V Premiu de poesía Selmana de les Lletres», p’alumnáu de primaria ya secundaria del conceyu de Grau. Esta entrega ta organizada a medias ente la Conseyería de Cultura del Principáu d’Asturias ya l’Aula de las Metáforas de Grau.

Toos estos actos van ser de baldre ya espeyan el compromisu de los moscones cola llingua asturiana.

II Cursu d'asturianu en Grau (dende abril hasta mayu)

El Serviciu de Normalización Llingüística de los conceyos de Grau ya Candamu organiza dous cursos d’iniciación d’asturianu p’adultos. Ún d’ellos va ser en Grullos, la capital del conceyu de Candamu, ya l’outru, en Grau, la capital moscona.

Las clases nel conceyu de Grau van empezar el llunes 2 d’abril a las 19:00 ya van estendese hasta’l 28 de mayu na Casa la Cultura de Grau, palaciu Miranda-Valdecarzana. Esti cursu nun va ser una continuación del anterior cursu que se fixo en Grau, que duróu dende octubre hasta febreiru, anque las clases sí van siguir la llinia educativa que se llevóu a cabu nestos meses (por eso se denomina “Fase B”). Pa matriculase en Grau nun fai falta nada más que llamar n’horariu de mañana los martes ou los miércoles al Serviciu de Normalización Llingüística de Grau (985 95 22 29), mandar un corréu electrónicu a llingua@ayto-grado.es ou dir en persona al Serviciu (Casa la Cultura de Grau, palaciu Miranda-Valdecarzana, CP: 33820). Por cuestiones organizativas, ponse un límite de 30 personas pa las clases ya, en superando esi tope, los que quieran apuntase van tener qu’aguardar nuna llista d’espera.

Las clases en Grullos van empezar el miércles 4 d’abril a las 19:00 ya van estendese, hasta’l 30 de mayu. Las sesiones van faese nel Centru Polivantente de la capital candamina. Pa matriculase en Candamu nun fai falta nada más que llamar n’horariu de mañana al ayuntamientu (985 82 80 56), mandar un corréu electrónicu a llingua@ayto-candamo.es ou dir en persona al Serviciu (Casa del Conceyu de Candamu, Grullos, CP: 33829). Esta yá la primer vez que nel conceyu de Candamu s’organiza un cursu d’asturianu p’adultos ya espérase bastante participación.

Los dous cursos van ser de baldre ya van constar caún de nueve sesiones de dous horas caúna. Pue apuntase tol mundu, mayor de 16 años, que nun conoza la llingua asturiana ou que quiera afondar un poucu nella. Nun se precisan conocimientos previos d’asturianu pa inscribise ya nun yá necesariu nengún tipu de material pa siguir las clases.

Estos cursos son una nueva aproximación a la llingua asturiana dende los conceyos de Grau ya Candamu ya tienen l’oxetivu d’aprender nestos meses a falar, escribir, entender ya interaccionar na variedá occidental del asturianu, que tien bien presencia nestos conceyos, así como nel estándar llingüísticu de la variedá central.

Más información:
Miguel Rodríguez Monteavaro
Técnicu de Normalización Llingüística de los conceyos de Grau ya Candamu
Telf: 985 95 22 29
Corréu: llingua@ayto-grado.es

Echa a andar el Serviciu de Normalización Llingüística de los conceyos de Grau ya Candamu

Dende finales del mes de septiembre del añu 2017 echa a andar el Serviciu de Normalización Llingüística de los conceyos de Grau ya Candamu, como apuesta firme d’estos conceyos pola normalización de la llingua asturiana nel ámbitu municipal y social.

La persona que se vei encargar d’esti serviciu del conceyu yá’l filólogu Miguel Rodríguez Monteavaro ya la oficina va trabayar nos dous conceyos asturianos al empar: en Candamu, los llunes ya los xueves, ya en Grau, los martes, miércoles ya vienres. Esta nueva sección d’estos conceyos occidentales va depender de las respectivas conceyalías de cultura ya vei trabayar pola integración progresiva de la llingua asturiana en tolas estaxas de la sociedá.

Esti serviciu ñaz cola ayuda de la Conseyería de Cultura d’Asturias ya col apoyu de los conceyos de Grau ya Candamu ya forma parte de los planes de normalización llingüística que se vienen llevando a cabu dende los últimos años nos diferentes conceyos. Los obxetivos principales d’esta nueva sección municipal son dar usu a la llingua asturiana sin prexuicios ya usala cola firme convicción d’equiparala a la castellana na alministración local. Esta actitú positiva hacia la cultura propia yá vien reflexándose en dellas actuaciones de los equipos de gobiernu de Grau ya Candamu dende la última llexislatura ya faise autónoma agora cola creación del nuevu plan de normalización. Outra parte del trabayu del serviciu ha ser promover, asesorar ya traducir testos ya cartelería de las asociaciones de los dous conceyos, amás de sirvir de puntu d’apoyu p’aquellas personas que quieran dar promoción a la llingua asturiana en cualquier ámbitu de la sociedá.

Lu primeiru que se vei organizar ha ser un cursu d’asturianu básicu na Casa la Cultura de Grau ya una renovación de la cartelería de la casa conceyu de Candamu. Estas primeras actuaciones van tar siguidas de más ya van poder siguise dende’l Facebook del Serviciu de Normalización Llingüística de Grau ya Candamu (https://www.facebook.com/grauyacandamu).

Más información:
Miguel Rodríguez Monteavaro
Técnicu de Normalización Llingüística de los conceyos de Grau ya Candamu
Telf: 985 95 22 29
Corréu: llingua@ayto-grado.es // llingua@ayto.candamo.es

IV PREMIU DE POESÍA «SELMANA DE LES LLETRES» pa escolinos de Grau

Por cuenta de la celebración de la 38 Selmana de les Lletres Asturianes, que va
desenvolvese nel mes de mayu del 2017, la Conseyería d’Educación y Cultura del
Principáu d’Asturies y la Fundación Aula de les Metáfores convoquen el IV PREMIU DE
POESÍA «SELMANA DE LES LLETRES» pa escolinos y escolines d’Educación Primaria y
alumnos y alumnes d’Educación Secundaria y Bachilleratu del conceyu de Grau,
d’alcuerdu con estes bases.

BASES

PRIMERA.‐ Pue participar l’alumnáu del conceyu de Grau, dende Educación Primaria
hasta Bachilleratu.

SEGUNDA.‐ Los participantes puen presentar, de forma individual, ún o dellos poemes
escritos n’asturianu. Los poemes tienen que ser inéditos y nun tar publicaos enantes al
traviés de nengún mediu, impresu o dixital.

TERCERA.‐ La temática y el llargor de los poemes ye llibre.

CUARTA.‐ Van dase un primer premiu, un segundu premiu y toles menciones d’honor
que decida’l Xuráu por caúna d’estes categoríes:
1. De Primeru a Terceru d’Educación Primaria
2. De Cuartu a Sestu d’Educación Primaria
3. De Primeru a Terceru d’ESO
4. Cuartu d’ESO y Bachilleratu
Los premios van poder declarase ermos en cualquier categoría, pero nun van poder
repartise ente dellos autores.

QUINTA.‐ Los primeros y segundos premios van consistir en llotes de llibros. Lo mesmo
estos que les menciones d’honor van recibir los diplomes acreitativos
correspondientes. Amás, los poemes ganadores van esponese nel Aula de les
Metáfores mientres la Selmana de les Lletres Asturianes y darréu publicase na revista
Las Hojas del Foro, editada pol Foru de Creación y Llectura de la Biblioteca de Grau.

SESTA.‐ Los trabayos van poder presentase, pol autor o autora o pol centru educativu,
na Casa la Cultura de Grau (C/ Cerru de la Muralla, e/n), dende la publicación d’estes
bases hasta’l día 7 d’abril, nun sobre zarráu onde se tien qu’escribir: IV PREMIU DE
POESÍA «SELMANA DE LES LLETRES». Nel sobre han metese los poemes, que tienen
que llevar TÍTULU, NOME, CICLU y CENTRU del autor o autora.

SÉPTIMA.‐ El Xuráu va tar formáu por persones averaes al mundu de la lliteratura, la
cultura y la educación.

OCTAVA.‐ El fallu del Xuráu va facese públicu nel actu de celebración de la poesía que,
dientro de la 38 Selmana de les Lletres Asturianes, va desenvolvese nel Aula de les
Metáfores el día 3 de mayu del 2017.

NOVENA.‐ La participación nel premiu supón aceptar estes bases. El fallu del Xuráu nun
se pue retrucar.

Grau, 10 de febreru del 2017

III Premiu de Poesía pa Escolinos y actos de la "Selmana de les Lletres" en Grau

III Premiu de Poesía pa Escolinos y actos de la "Selmana de les Lletres" en Grau

XXXVII Selmana de les Lletres Asturianes
Presentación del llibru "Ferralla" d'Antón García.
Premiu "Xuan María Acebal" de Poesía.
...

Entrega de diplomes del III Premiu de Poesía Selmana de les Lletres, p'alumnáu de Primaria y Secundaria del conceyu de Grau.

Actuación musical al cargu del Conservatoriu Superior de Música
d'Uviéu "Eduardo Martínez Torner"

- Martes, 3 de mayu, 19:30 hores
- Capiella de los Dolores (Grau - Asturies)

 

CURSOS DE LLINGUA ASTURIANA P´ADULTOS (Nivel I y II)

CURSOS DE LLINGUA ASTURIANA P´ADULTOS (Nivel I y II)

Inscripción gratuita hasta el martes 13 de setiembre na Biblioteca Municipal de Grau.

Duración: Tres meses dos díes a la selmana.

Axuntamientu el martes 13 de setiembre a les 19 h. na Casa la Cultura de Grau.

Entama la Conceyalía de Cultura del Ayuntamienu de Grau col sofitu de la Conseyería de Cultura y Deporte del Principáu d´Asturies

Recital poéticu

Cursos de Bable en Grau

CURSOS DE LLINGUA ASTURIANA P´ADULTOS (Nivel I y II)

Inscripción gratuita hasta el miércoles 13 de ochobre na Biblioteca Municipal de Grau.

Duración: Tres meses dos díes a la selmana.

Axuntamientu el xueves 14 de ochobre (nivel II a les 19 h. y nivel I a les 19:30 h. na Casa la Cultura).

Organiza: Conceyalía de Cultura del Ayuntamientu de Grau

Col sofitu de la Conseyería de Cultura y Turismo del Princiáu d´Asturies

Profesor: Xosé Lluís Rodríguez Alberdi.