Chicolateras/Chocolateras del Museo Etnográficu de Grau

Va dellos días difundimos estas 4 semeyas de piezas de la colección del Muséu Etnográficu de Grau pa ver si las reconocíais, ya pa ver si nos podéis cuntar cousinas d'ellas, de la sou rellación col conceyu Grau, etc.

Güei vamos cuntavos dalgo más sobre ellas gracias a esti testu que nos apurrió l’arqueólogu Santiago Rodríguez Pérez. Gracias tamién al Serviciu de Normalización de Grau ya Candamu pola torna del testu.

Como yá indicóu nel sou comentariu Mari Paz Méndez, las piezas qu’espunximos yeran chicolateras.

Las de cobre fonon fabricadas en Miranda (Avilés), au esistióu una industria tradicional de fabricación de calderas, sartenes, ya outras piezas de cobre, a lo menos dende’l sieglu XVII, pero probablemente dende muncho enantes. Los caldereiros vendían la sou producción en Galicia, Asturias ya Lleón. Son piezas de cobre batíu, col mangu de fierro, entrambas las dous del sieglu XIX.

La segunda de fierro fundíu, ta fabricada por A.K. & Sons (Archibald Kenrick and Sons), en Birmingham, na segunda metá del sieglu XIX. N’Asturias, xunta las de cobre, importábanse estas piezas, que bien llueu fonon sustituyidas polas fabricadas eiquí, como la cuarta que vos amosamos, de fundición de fierro ya esmalte blancu nel interior, fabricada en Xixón pola compañía de Laviada y Cía, al rodiu 1900.

El consumu de chicolate ponse de moda a lo llargo del sieglu XVII, ya pasu ente pasu, estiéndese’l sou consumu na sociedá. Nel inventariu de bienes del palaciu de Miranda-Valdecarzana, del añu 1719 (l’actual casa Cultura de Grau), ente outros muebles ya oxetos, méntase yá “una piedra de llabrar chicolate con dous duernos, una mano ya una paleta de fierro ya un cuchiellu ya una manta que sirve pa lo mesmo”.

Cola llegada de la industrialización, entama la producción masiva de chicolate ya’l sou consumu popularizóuse muncho n’Asturias a finales del sieglu XIX. Las fábricas más antiguas d’Asturias yeran “La Primitiva Indiana” (Xixón, 1860), ya la “Perla Americana” (Uviéu, 1853). Poco a poco, fonon creándose pequeñas fábricas por tolos conceyos.

En Grau tamién hubo molinos ya producción chicolatera. Yá nel diccionariu de Madoz, en 1845 cítanse dellos molinos nel conceyu. Posteriormente, creánonse pequeñas fábricas. Concretamente dous:

•       Chocolates Manuel Coalla, propiedá de Manuel Coalla Suárez. La primer fábrica fixénonla n’Alcubiella (tenemos noticia d’ella a lo menos dende 1902, nel llibru Asturias Industrial), ya d’ehí treslladóuse a la cai Eduardo Sierra, de la villa moscona (publicidá de la mesma apaez en 1924, nel llibru Asturias. Guía monumental, histórica, artística, industrial, comercial y de profesiones, asina como nel Álbum comercial, literario, gráfico y descriptivo de Grado y su concejo).

•    Chocolates “La Somedana”, propiedá de Manuel Álvarez Rodríguez, rexistrada en 1928.    Entrambas las dous tán recoyidas nel trabayu de Claudia Prieto Rodríguez, Chocolate y publicidad en Asturias. Las fábricas de chocolate, 2015).

Si queréis enanchar la información sobro’l chicolate ya la sou industria n’Asturias, recomendámosvos el llibru de Claudia Rodríguez, que podéis consultar n’internet:

Prieto Rodríguez, Claudia (2015). Chocolate y publicidad en Asturias. Las fábricas de chocolate. Xixón: Muséu del Pueblu d’Asturies; Fundación Municipal de Cultura, Educación y Universidá Popular; Conceyu Xixón. Disponible en: https://museos.gijon.es/from/9935/publicacions/show/7068-chocolate-y-publicidad-en-asturias-las-fabricas-de-chocolate.

Tamién podéis alcontrar información eiquí:

https://nosoydignodetuamor.blogspot.com/2012/04/la-vida-domestica-en-asturias-1800-1965.html

Deixámosvos eiquí outros llibros ya artículos rellacionaos cola vida tradicional ya con Grau, que tán disponibles tamién en PDF.

Vigón Menéndez, Lucía (2016). Monasterios, salud y burguesía. 1850-1975: auge y declive de la industria chocolatera en Asturias. Disponible en: https://thefoodiestudies.com/monasterios-salud-y-burguesia-1850-1975-auge-y-declive-de-la-industria-chocolatera-en-asturias/ [descargar el PDF]

Madrid Álvarez, Vidal de la (2005). "El palacio de Miranda-Valdecarzana y la capilla de Nuestra Señora de los Dolores de Grado". Liño: Revista anual de historia del arte, pp. 103-125.  Disponible en: https://www.unioviedo.es/reunido/index.php/RAHA/article/view/1733 [descargar el PDF]

López Álvarez, Juaco; Gayo Arias, Sonia; Lombardía Fernández, Carmen; Pérez Morán, Elena (2005). Los asturianos na cocina. La vida doméstica n’Asturies, 1800-1965 / Los asturianos en la cocina. La vida doméstica en Asturias, 1800-1965. Catálogo de la exposición. Xixón: Muséu del Pueblu d’Asturies; Fundación Municipal de Cultura, Educación y Universidá Popular; Conceyu Xixón. Disponible en: http://www.gijon.es/publicacions/show/4256-los-asturianos-en-la-cocina-la-vida-domestica-en-asturias-1800-1965/

VVAA (2002). Trabayar pa comer: producción y alimentación na Asturies tradicional. Documentación xeneral. Xixón: Fundación Municipal de Cultura, Educación y Universidá Popular. Disponible en: https://museos.gijon.es/publicacions/show/4996-trabayar-pa-comer-produccion-y-alimentacion-na-asturies-tradicional