Agenda concejo de Grado/Grau

viernes, 22 de mayo de 2020

Pieza 2. Cántara del lleche


Fai dellos días asoleyemos la semeya d’una pieza de la colección del Muséu Etnográficu de Grau ya güei espublizamos la esplicación redactada pol arqueólogu Santiago Rodríguez Pérez. Gracias tamién al Serviciu de Normalización de Grau ya Candamu pola revisión del testu:
De xuru, acertastis. Yá una cántara pa tresportar el lleche, al mercáu o a la esñatadora. Tamién valían pa dir por augua, ya contener líquidos en xeneral.

En 1881 créase en Xixón la primer fábrica d’hoxalata. Con esti material, los ferreiros/hoxalateiros, entaman a fabricar preseos (queseras, candiles, mantequeras, etc.) ya tamién cántaras como esta, que fonon sustituyendo a las ferradas de madera ya recipientes de barru. Las cántaras d’hoxalata tenían ventayas: yeran más hixénicas, fáciles de llavar, de menos mantenimientu ya permitían conservar bien el lleche nel tresporte, sobre manera nel branu.

Estas cántaras usábanse pa llevar el leche al mercáu ou pa recoyela nas caserías ya distribuyila, ya tamién pa llevala a las esñatadoras. Polos años 1910-1920, entaman a desendolcase las primeras industrias llácteas n’Asturias, las fábricas de mantega ya queisu. Una d’ellas, la d’Ángel Arias, en 1920, empecipióu a repartir ya instalar esñatadoras mecánicas (las de manivela que inda se ven en mercaos) polos pueblos ya villas, creando puntos de recoyida pa llevar dempués las ñatas a la fábrica a faer mantega. Las máquinas taban en casas particulares ya en comercios; en Grau había esñatadoras na villa, ya tamién en pueblos como Temia, Santianes de Molenes, Santu Adrianu del Monte, etc., au se llevaba el lleche pa sacar la ñata ya vendela.

La xente baxaba colas cántaras del lleche cargadas nas albardas de los burros au taba la esñatadora. Esñataban el lleche, ya devolvíanlu esñatáu, col sueru, ya pagaban polas ñatas, que yera lo que se vendía. Dempués, venían las camionetas a recoyer la materia prima pa llevala a la fábrica. Por Grau pasaba la llinia de la fábrica d’Arias, que cubría Uviéu-Les Regueres-Candamu-Grau ya Pravia. Pasada la guerra, las fábricas entamanon a recoger el lleche directamente ensin esñatar.
Eso yá lo que tán faendo las muyeres de la semeya, tán aguardand
o a que-ys entreguen el lleche dempués de llevalu a esñatar. La semeya féixose’l 2 de febreiru de 1925 en L.luarca, ya’l pie de semeya yá “Lecheras en Luarca”. Féixola Ruth Mathilda Anderson, una investigadora americana que percorrióu Asturias en 1925, ya de la que se feixo una esposición fai dous años en Xixón ya qu’anduvo por Asturias, entitulada Hallazgo de lo Ignorado. Fotografías de Asturias de Ruth M. Anderson para la Hispanic Society of America, 1925 (podéis ver dellas semeyas más eiquí: https://www.lavozdeasturias.es/noticia/cultura/2018/07/17/mujer-mostrara-asturias-nunca-habias-visto/00031531840008527679806.htm )

Las cántaras de lleche típicas que tenemos agora n’alcordanza son las d’aluminiu, que s’usaban pa tresportar el lleche ou almacenalu pa la recoyida del camión. Estas entamanon a fabricase nos años 20, ya fonon deixando d’usase cola xeneralización de los tanques de fríu modernos nas ganaderías, nos años 80-90. Pero enantes d’estas, por un tiempo usánonse muncho las d’hoxalata. N’Andalucía, La Mancha, ou Extremadura, úsanse pa tresportar aceite ya vinu, ya llámanlas zafras, alcuzas, ou cántaras.

Si queréis saber más cousas de la historia de la industria lláctea n’Asturias, hai dous llibros bonos sobre’l tema, d’au garremos información pa esti testu:



No hay comentarios:

Publicar un comentario